好多人（其實只係幾個）叫我寫多啲生活雜文，但因為我個人真係比較乏味，冇咩生活嘢好講，諗咗幾日暫時淨係諗起一單撞鬼經歷，喺度同大家分享下：
早排有晚我因為度故仔諗極都諗唔通，所以半夜拉咗男朋友落街行下，睇下會唔會有靈感。
嗰時大約係凌晨兩三點，條街一個人都冇，除咗便利店之外，基本上所有鋪頭都關晒門。
我哋一路行一路傾，經過一條後巷嗰時，男朋友向入面望咗一眼，突然話：「我好似見到啲嘢，快啲走。」之後就拉住我跑，跑到去便利店之後，我問佢見到咩嘢？佢話見到條巷入面有一團白色人影。我話係咪人嚟咋？佢話條巷咁黑，就算係著白色衫都唔會咁清楚咁明顯，好似有少少發光咁。
補充一下，其實佢個體質係好常瀨嘢，對靈異嘢好敏感，一接近就會頭痛。有一次佢喺書檯做嘢，我坐喺佢後面玩電話，碌咗電話大半個鐘都冇事，直到我無聊click咗入一個講鬼神嘅post入面，點知佢即刻擰轉頭問我：「你睇緊咩嘢？我突然覺得有啲頭痛。」
講返嗰晚，雖然橋又未度到，但係我哋都係決定返去先。上到屋企，我就再追問佢見到嘅影像係點樣，呢個時候，我哋兩個人都好清楚聽到門口出面有把女人聲，發出啲形容唔到嘅聲音，100%係最老套嗰種鬼片會聽到，類似呻吟又類似嘆氣嘅「嗚……」，我哋靜咗對望，然後我話：「唔係跟咗我哋上嚟吖嘛……」一講完，門口嗰把聲又再響起：「嗚……」
呢個時候，男朋友好大聲咁講：「喂，我哋行過咋喎，又冇搞你，你唔好咁過份！」講完之後，把聲就冇咗。
然後，就沒有然後了，真人真事嘅鬼故往往都係咁，唔似小說咁有起承轉合，體諒下。
呢件事令我發現，原來鬼真係會發出《陰陽路》式嘅叫聲嚟嚇人，又原來好似《回魂夜》周星馳講嘅一樣，「只要揸緊信念，鬼都奈我哋唔何。」
不過寫呢篇嘢嘅時候，我都不禁諗到，如果嗰刻我打開門，究竟會見到啲咩……？
＝＝＝＝＝＝＝＝＝＝＝＝＝＝＝＝
新開Patreon會有獨家小說連載同雜文，三本已出版小說足本重溫：
https://www.patreon.com/chanfan
Search